Аймгийн хэмжээнд ашигт малтмалын  хүчин төгөлдөр 183 тусгай зөвшөөрөл нийт нутаг дэвсгэрийн 967.2 мянган га талбайг буюу 6.8 хувийг, үүнээс 47 ашиглалтын тусгай зөвшөөрөл нийт нутаг дэвсгэрийн 67.5 мянган га талбайг буюу 0.47 хувь, 136 хайгуулын тусгай зөвшөөрөл нийт нутаг дэвсгэрийн 899.7 мянган га талбайг буюу 6,36 хувийг тус тус эзлэж байна. /2017.11.05 байдлаар/

Дээрхи тоо баримтыг 2015 оны 11 дүгээр сарын судалгаатай харьцуулахад  ашигт малтмалын тусгай зөвшөөрлийн тоо 24-ээр, эзлэх талбайн хэмжээ 503.1 мянган га-аар буюу 3.6 хувиар буурсан дүнтэй байна.

        Байгаль орчин, ногоон хөгжлийн сайдын 2014 оны А-3, А-4, А-5 дугаар тушаалаар батлагдсан “Байгаль орчны нөлөөллийн үнэлгээнд олон нийтийн оролцоог хангах журам”, “Байгаль орчныг хамгаалах, нөхөн сэргээлтийн баталгааны тусгай дансны гүйлгээнд хяналт тавих журам”, “Байгаль орчны менежментийн төлөвлөгөө боловсруулах, хянан батлах, тайлагнах журам” –уудын хэрэгжилтийг хангах ажиллах ажлын хүрээнд сумдын Засаг дарга болон байцаагч нарт ашигт малтмалын тусгай зөвшөөрлийн дагуу үйл ажиллагаа явуулж буй аж ахуйн нэгжүүдийн Байгаль орчны менежментийн төлөвлөгөө болон нөхөн сэргээлтийн баталгаа, тусгай дансны бүрдүүлэлт, зарцуулалтанд  хяналт тавьж журмын дагуу  ажиллах тухай зөвлөмжийг жил бүр хүргүүлэн хэрэгжилтийг ханган ажиллаж байна.

       Ашиглалтын тусгай зөвшөөрөлтэй 47 талбай бүртгэлтэй байгаагаас тайлант онд 7 талбайд олборлолтын үйл ажиллагаа явуулж буй “Алтайн хүдэр” ХХК-ий Таяннуур, “Мандал-Алтай” группын Хөв булгийн уурхай, Цогт эрин транссын Бөөрөгийн алтны уурхайн 2017 оны байгаль орчны менежментийн төлөвлөгөөний хэрэгжилтэнд аймгийн Засаг даргын 2016 оны А/154 дүгээр захирамжаар томилогдсон ажлын хэсэг хяналт шалгалт хийн арга зүйн зөвлөгөө болон  үнэлэлт, дүгнэлт өгч ажиллаж байна.

    Олборлолтын үйл ажиллагаа явуулж буй 4 аж ахуйн нэгж нь байгаль орчны менежментийн төлөвлөгөөнд тусгагдсан ажлуудын хэрэгжилтийг хангах зорилгоор 2017 онд нийт 102.4 сая төгрөг зарцуулсан байна.  Олборлолтын үйл ажиллагаа явуулж буй 4 аж ахуйн нэгж нь 2015 оноос хойш нөхөн сэргээлтийн баталгаа хөрөнгө нийт 78.3 сая төгрөгийг БОАЖЯ-ны дэргэдэх тусгай дансанд байршуулсан байна.